“காஸாவிற்கு செல்லும் தன்னார்வலர் படகில் இருந்த 211 பேரை இஸ்ரேல் கடத்தி சென்றுள்ளது!….

மத்திய தரைக்கடலில் காஸாவை நோக்கிச் சென்ற ‘குளோபல் சுமுத்’ (Global Sumud Flotilla) உதவிப் படகுகளில் இருந்த 211 தன்னார்வலர்கள் மற்றும் செயல்பாட்டாளர்களை இஸ்ரேல் கடற்படை தடுத்து நிறுத்தித் தனது கட்டுப்பாட்டிற்குள் கொண்டுவந்துள்ளதாக சர்வதேச ஊடகங்கள் மற்றும் அமைப்பின் ஒருங்கிணைப்பாளர்கள் உறுதிப்படுத்தியுள்ளனர்.

சர்வதேச கடல் எல்லையில், கிரீஸ் நாட்டிற்கு அருகிலுள்ள கிரீட் (Crete) தீவுப் பகுதியில் பயணித்த ‘குளோபல் சுமுத்’ (Global Sumud) அமைப்பின் படகுகளை இஸ்ரேலியக் கடற்படை தடுத்து நிறுத்தியது.

இந்தப் படகுகளில் பாரிஸ் நகர சபை உறுப்பினர் உள்ளிட்ட 211 மனித உரிமை ஆர்வலர்கள், அரசியல் பிரமுகர்கள் மற்றும் செய்தியாளர்கள் பயணம் செய்தனர்.

இஸ்ரேலின் கடற்பகுதியில் இருந்து மிகத் தொலைவில் உள்ள சர்வதேச கடல் பரப்பிலேயே இந்த நடவடிக்கை மேற்கொள்ளப்பட்டதாக ஃபிளாட்டிலா அமைப்பின் செய்தித் தொடர்பாளர் ஹெலன் கொரோன் (Helene Coron) குற்றம் சாட்டியுள்ளார்.

காஸாவில் உள்ள மக்களுக்கு அவசர மருத்துவ மற்றும் உணவு உதவிகளை வழங்குவதற்காகச் செல்லும் இந்த அமைப்பினர், சர்வதேச விதிகளின்படி தாங்கள் பாதுகாப்பாகச் செல்வதாகவும், இஸ்ரேலின் இந்த நடவடிக்கை ஒரு சட்டவிரோதக் கடத்தல் (Kidnapping) என்றும் கண்டனம் தெரிவித்துள்ளனர்.

ஹமாஸ் அமைப்பின் தூண்டுதலின் பேரில்தான் இந்த உதவிப் படகுகள் அனுப்பப்படுவதாகக் கூறி, அமெரிக்காவின் தற்போதைய அமைதி முயற்சிகளைச் சீர்குலைக்கும் நோக்கில் நடத்தப்படும் ஒரு பிரசாரமாக இதனை இஸ்ரேல் விவரிக்கிறது. டொனால்ட் டிரம்பின் அமைதித் திட்டங்கள் முழுமையடையும் வரை கடல்சார் முற்றுகை தொடரும் என இஸ்ரேல் தரப்பில் தெரிவிக்கப்பட்டுள்ளது.

மனிதநேயப் பணியில் ஈடுபடும் தன்னார்வலர்கள் மற்றும் பத்திரிகையாளர்கள் மீது மேற்கொள்ளப்படும் இந்த நடவடிக்கைகள், சர்வதேச அளவில் பெரும் கொந்தளிப்பை ஏற்படுத்தியுள்ளன. ஒருபுறம் அமைதிப் பேச்சுவார்த்தைகள் நடந்து கொண்டிருக்கும் அதேவேளையில், இத்தகைய கடுமையான கடல்சார் நடவடிக்கைகள் மத்திய கிழக்கின் பதற்றத்தை மேலும் அதிகரிக்கச் செய்யும்.